Оросой Геройн дурасхаал тоонто нютагтань мүнхэлэгдэбэ

Жаргал Баирович Гомбоев Захааминай аймагай Мэлэ тосхондо 1975 оной октябриин 4-дэ түрэһэн байгаа. 1992 ондо нютагайнгаа һургуули дүүргэжэ гараад, сэрэгэй албанда татагдаа. Тиигэжэ сэрэгэй ажабайдалтай ами наһаяа холбоһон юм. Мүнөө түрэл һургуулиингаа ханада хэтын хэтэ мүнхэлэгдэбэ гээшэ.

Жаргалай һуража гараһан Мэлын юрэнхы болбосоролой дунда һургуулиин баярай суглаан Буряад Уласай Засагай газарай, аймагай захиргаанай, аймагай нютагуудай захиргаануудай, һургуулинуудай захиралнуудай, нютагайхидай, суг алба хэһэн нүхэдэй, һургуулиин багшанарай болон һурагшадай хабаадалгатай үнгэрөө. Дурасхаалай самбар нээлгэдэ Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшэ Виталий Лыгденов хабаадаа.

- Нютагаймнай хүбүүн, Оросой Герой Жаргал Баирович аймагай, уласай, бүхы ороноймнай омогорхол. Энэ дурасхаалай тэмдэг бүхы хүнүүдтэ эрэлхэг зоригой, сэрэгэй уялгада, эсэгэ орондоо үнэн сэхэ ябадалай үльгэр жэшээ боложо байха гэжэ этигэнэб, – гэжэ Виталий Лыгденов тэмдэглэбэ.

Байгша оной сентябриин 29-дэ Оросой Геройн Алтан Мүшэн гэр бүлэдэнь дамжуулагдаа бэлэй. Сэрэгэй Зүүн зүгэй тойрогой 36-дахи армиин 37-дохи гвардиин мотострелково бригадын мотострелково батальоной мотострелково ротын мотострелково взводой командир Оросой Холбооной сэрэгэй нэгэдэмэл бүридэлдэ Сэрэгэй тусхай ябуулгада хабаадажа байгаа. Тэрэнэй хойноһоо наһанайнь нүхэр, дүрбэн хүүгэдынь үлөө.